குறிப்புக்கள் - (Notes)
வேறுபாடுகள் - (Pathanthara)
³ - நம்முகொன லேரண்டி - நம்முகோ லேரண்டி.
⁵ - கீர்தி விண்டி மரி மரி - கீர்தி மரி மரி : 'விண்டி' என்ற சொல்லில்லாது பொருள் நிறைவுபெறாது.
⁹ - ஸ₁ரஜ லோசன - ஸரஸிஜ லோசன.
Top

மேற்கோள்கள்
¹ - புமானுட₃னி - ஆண்மகனோ அல்லவோ - வனவாசத்திற்கு சீதையை உடன் அழைத்துச் செல்ல ராமன் மறுத்தான். எவ்வளவோ கூறியும், ராமன் இணங்காததனால், சீதை பொறுமையிழந்து, 'நீ ஆண்மகனோ, அல்லவோ' என்று கேட்டாள். அதனால், நாணம் அடைந்த ராமன், சீதையை அழைத்துச் செல்ல சம்மதித்தான். இந்த சொற்களைத் தியாகராஜரும் பயன்படுத்துகின்றார்.

சீதை கூறியது -
"எனது தந்தையாகிய விதேகன், மிதிலை மன்னன், ராமனை மருமகனாக அடைந்து,
ஆண் உருத்தில் உள்ள பெண்ணென உன்னைக் கருதினாரா?"
(வால்மீகி ராமாயணம், அயோத்தியா காண்டம், 30-வது அத்தியாயம்)

⁴ - த₄ர்மாதி₃ - அறம் முதலான - அறம், பொருள், இன்பம், வீடு. இவை 'புருஷார்த்தம்' (மனிதப் பிறவியில் கடைப்பிடிக்க வேண்டியவை) எனப்படும். முதல் மூன்றினையும் கடைப்பிடிப்பதால்தான் வீடு கிடைக்கும் என்று சாத்திரங்கள் கூறும்.

¹¹ - ஆ-ஜானு பா₃ஹ - முழந்தாள் நீளக் கைகளோன் - 32 சாமுத்திரிகா (உடலுறுப்புகளின்) இலக்கணப்படி, ஆண்களுக்கான ஓர் இலக்கணம்.
Top

விளக்கம்
² - க₃ர்வமு - கருவம். சில புத்தகங்களில், இச்சொல் ராமனைக் குறிப்பதாகக் கூறப்பட்டுள்ளது - அதாவது ராமனுக்கு (தனக்கு ஈடில்லையென) கருவம் என. இந்த சரணத்தின் மற்ற வரிகளை நோக்குகையில், இது தியாகராஜர், இராமனைப் பற்றி பெருமிதப்படுவதாகத்தான் கொள்ளமுடியும். எனவே, 'பெருமிதம்' என்று மொழி பெயர்க்கப்பட்டது.

³ - மர்மமு - மருமம். இது இறைவனின் 'அவதார மருமம்' (அரக்கரிடமிருந்து முனிவர்களைக் காத்தல்) அல்லது 'சரணாகதி' எனப்படும் 'இறைவனிடம் அடைக்கலம் புகுதலின் மருமம்' என்றோ, அல்லது இரண்டுமே என்றோ பொருள் கொள்ளலாம்.

³ - மர்மமெரிகி₃ நம்முகொன லேரண்டி - மருமம் அறிந்து நம்ப முடியாத - அகலிகையை மீட்டது, ஜடாயு என்ற கழுகுக்கும், சபரிக்கும் மோக்ஷம் அளித்தது, ஆகியவை சாத்திரத்தினால் அங்கீகரிக்கப்படாத, ஆனால் இறைவனின் பெருங்கருணையினால் நிகழ்ந்தவையாகும். இதனைத்தான், தியாகராஜர் 'நம்பமுடியாத' என்று கூறுகின்றார். இறைவனின் 'அவதார மருமம்' மற்றும் 'சரணாகதி மருமம்' அறிந்தவர்களே இவற்றின் சிறப்பினை உணரமுடியும் என்கிறார்.
Top

ராமனே, தனக்கு அத்தகைய வல்லமைகள் ஏதும் இருப்பதாகக் கூறவில்லை. வால்மீகி ராமாணத்தில் (யுத்த காண்டம், 117-வது அத்தியாயம்), சீதை நெருப்பினுள் புகுகையில், சிவனும், பிரமனும், ராமனின் அவதாரத்தை நினைவூட்டித் தடுத்தனர். அவ்வமயம், ராமன் கூறியது -

"நான், என்னை, தசரதன் மைந்தனாகிய, ராமன் எனும் மனிதனாகவே கருதுகின்றேன்.
நான் யார், எங்கிருந்து வந்தேன் என, பெருந்தகைகள் நீவிர் கூறுவீராக."

⁶ - செயி பட்டி - கைப் பற்றி. இந்த சொல், பெண்ணின் கையினைத் திருமணத்தில், ஆண் பற்றுவதைக் குறிக்கும். இந்த கிருதி, 'நாயகி மனப்பாங்கினில்' அமைந்துள்ளது. அதனால்தானோ என்னவோ, அனுபல்லவியில், தியாகராஜர், சீதையின் சொற்களை (நீ ஆண்மகனா?), தான் பயன்படுத்துகின்றார்.

⁷ - ஸ்மரண தெலிஸி - நி்னைவு தெரிந்து. பொதுவாக, நான்கு வயதுக்குப் பிறகுதான் குழந்தைக்கு 'நான்' என்ற தன்னுணர்வு உண்டாகும். இதனைத் தானோ, என்னவோ, தியாகராஜர், 'ஸஹஜ பக்தி' (உடன்பிறந்த பக்தி) என்று 'ஸ்வர ராக₃ ஸுதா₄' என்ற கீர்த்தனையில் கூறுகின்றார்.
Top

⁸ - கோ₃சரமுல நே பல்குகொன்னானு - புலப்பாட்டினை நான் சொல்லிக் கொண்டேன். 'இறைவன் புலன்களுக்கு அப்பாற்பட்டவன்' என்று தியாகராஜரே, தனது 'வாசாமகோ₃சரமே' என்ற கீர்த்தனையில் கூறுகின்றார். ஆயினும், பாமரர் (அறிவிலிகள்) போன்று, இறைவனின் புலப்பாட்டினை நான் சொல்லிக்கொண்டேன் என்றும், எனது சொற்களை மெய்ப்பிக்க வேண்டும், அதாவது, இறைவன் புலப்படவேண்டும், என தெண்டனிட்டேன் என்கின்றார். இதனைத்தானோ என்னவோ, மோஹன ராகத்தில் அமைந்துள்ள 'நன்னு பாலிம்ப' மற்றும் 'ப₄வ நுத' என்ற கீர்த்தனைகளில், தன் வீட்டிற்கு இறைவன் நேரிடையாக வந்ததாகக் கூறுகின்றார்.

¹⁰ - லாஜமுலு வேக₃க₃னேல - பொரி வெடிப்பதேன். தமிழில் இதனை 'எள்ளும் கொள்ளும் வெடித்தல்' என்று கூறுவர்.

பாமரர் - அறிவீனர்
புலப்பாடு - புலன்களால் அறியப்படுதல்
Top